Orbita.uz

Mendeleyev kimyoviy elementlar davriy jadvaliga yangi 4 ta element qo'shildi

07.01.2016 13:49 Muzaffar Qosimov Maqolalar - Qiziqarli kimyo

Mendeleyev kimyoviy elementlar davriy jadvaliga yangi 4 ta element qo'shildi

Nazariy va Amaliy Kimyo Xalqaro Ittifoqi (IUPAC) Mendeleyev kimyoviy elementlar davriy jadvaliga yangi to'rtta element qo'shilganini rasman tasdiqladi. Yangilangan davriy jadvalni Rossiya, AQSH va Yaponiya olimlari birgalikda tartiblashgan.

Davriy jadvalga yangi qo'shilgan elementlarga hozircha vaqtinchalik nomlar berilgan. Ulardan birinchisi Ununtriy deb nomlangan bo'lib, formulasi Uut, davriy jadvaldagi tartibi esa 113 bo'ladi ("Ununtriy" nomi lotinchada 113 degani). Shuningdek Ununpentiy - Uup (115), Ununseptiy - Uus (117) va Ununoktniy - Uuo (118) elementlari ham endi rasman tan olindi. Endilikda ushbu elementlarni kashf qilgan olimlarga yoki ilmiy guruhlarga mazkur elementlarga boshqa nom berish huquqi beriladi. Ushbu elementlarning kashf etilgani haqidagi xabarlar paydo bo'lganiga ancha yillar bo'lgan bo'lsa-da, shtab-kvartirasi Shimoliy Karolinadagi Research Triangle Parkda joylashgan IUPAC tashkiloti, ushbu elementlarni faqat 2015-yil 30-dekabr sanasiga kelibgina rasman tan oldi. Buning uchun o'sha elementlarni kashf qilgan olimlardan mustaqil ravishda, boshqa ilmiy ekspertlar ham ushbu elementlarni sintez qila olishlari talab etilardi. Odatda faqat shunday tasdiq orqaligina haqiqatan ham yangi kimyoviy element kashf etilgani rasman e'tirof etiladi. Shu sababli ham biz yangi 4 elementning davriy jadvalga rasman qo'shilishini 2015-yil so'ngigacha kutishga majbur bo'ldik.

Batafsil... Mulohaza va fikrlar (1)

Yangilаndi: 06.02.2025 10:45

Li E8 guruhini izlab

13.04.2016 14:44 Muzaffar Qosimov Maqolalar - Qiziqarli matematika

Li E₈ guruhini izlab

Deyarli yuz yildan ziyod vaqt mobaynida matematiklar ulkan 248-o'lchamli obyektni tushunishga urinib kelishdi. E₈ nomi bilan tanilgan ushbu obyektni o'rganishda eng kuchli dasturchilar va matematiklardan iborat xalqaro guruh va eng ilg'or superkompyuterlar jalb qilinganidan keyingina, 2007-yilda muayyan natijaga erishildi.

Lirik chekinish sifatida, Iogann Kepler (1571-1630) muallifligidagi "Olam tilsimi" (Mysterium Cosmographicum) asariga murojaat qilamiz. Kepler ham astronom va ham matematik olim sifatida simmetriya masalasiga shu darajada kuchli qiziqqanki, u butun Quyosh tizimi va undagi sayyoralarning orbitalarini bir-birining ustiga-ustak, ustma-ust joylashtirilgan platon shakllari, masalan, kub va dodekaedr ko'rinishida tasavvur qilish kerak deb taklif qilgan. Uning tasavvuridagi o'sha «samoviy simmetriya»da xuddi ulkan piyoz singari chizib ko'rsatilgan. Kepler simmetriyasining bu ko'rinishi ham miqdoriy jihatdan, ham, tadbiq etilishi sohasi jihatdan cheklangan bo'lib, aslida Koinotda simmetriyaning shunday murakkab turlari aniqlanganki, ular hatto Keplerning tasavvuriga ham sig'magan bo'lardi.

Batafsil... Mulohaza va fikrlar (1)

Yangilаndi: 05.02.2025 11:36

Yupiter

08.08.2013 04:41 Muzaffar Qosimov Ma'lumotnomalar - Astronomiya

Yupiter

Yupiter Quyosh tizimidagi eng katta sayyora. Quyoshdan uzoqlashish tartibida beshinchi va Yerga nisbatan Quyoshdan 5.2 marta uzoqroq masofada harakatlanadi. Yupiter Quyosh atrofida deyarli 12 yilda bir marotaba to'liq aylanib chiqadi. Uning ekvatorial diametri Yernikidan 11,2 marta katta bo'lib, 142984±2 km ni tashkil qiladi. Yupiterning o'z o'qi atrofida aylanish davri, boshqa sayyorlarga nisbatan eng kichik bo'lib, ekvatorida 9 soat, 50 daqiqa va 30 soniyani, o'rta kengliklarida esa, 9 soat, 55 daqiqa va 40 soniyani tashkil qiladi. Shu tarzda Yupiter ham xuddi Quyosh singari qattiq jism kabi aylanmay balki, turli qismlarida turlicha aylanish tezligi hosil qiladi. o'ta tezkor aylanishi tufayli bu sayyora qutblarida katta siqilish va zichlikning ortishi paydo bo'ladi. Yupiter massasi Yer massasidan 318 barobar katta. o'rtacha zichligi esa 1.326 gr/sm³ bo'lib, Quyoshning o'rtacha zichligiga yaqin qiymat hisoblanadi. Yupiterning aylanish o'qi uning orbitasiga deyarli perpendikulyar - burchak 87°. Ekvatoridagi erkin tushish tezligi 24.79 m/s².

Batafsil...

Yangilаndi: 05.02.2025 11:42

Maksvell iblisi

15.09.2016 09:55 Muzaffar Qosimov Maqolalar - Qiziqarli fizika

Maksvell iblisi

Maksvell iblisi - o'ylab topilgan xayoliy timsol bo'lib, u shotland fizigi Jeyms Klark Maksvellning ilmiy farazlari mahsulidir. Garchi u uydirma timsol bo'lsa hamki, jahonning eng yuksak zakovat egalari uchun ham o'tkir aqliy xurujlarga sababchi bo'lgan. Maksvell iblisi haqida qayd etib o'tilgan ilmiy adabiyotlar esa, termodinamika, statistik fizika, kvant mexanikasi, axborot nazariyasi, kibernetika, hisoblash texnikasining imkoniyatlari chegaralariga oid masalalar, biologiya, hamda, umuman olganda fan falsafasiga oid sohalarini qamrab oladi.

Maksvellning taklif etgan xayoliy faraziga ko'ra, ushbu iblis shunday bir ongli mavjudotki, u termodinamikaning ikkinchi bosh qonunini inkor eta oladi. Ya'ni, mohiyatan termodinamikaning ikkinchi bosh qonuni qoidalariga zid bo'lgan fizik hodisalarni yuzaga keltira oladi. Termodinamikaning ikkinchi bosh qonuning o'sha zamonlarda ommalashgan dastlabki ta'riflaridan biriga ko'ra, yopiq tizimning to'liq entropiyasi (tartibsizlik o'lchovi), vaqt mobaynida muttasil ortib boradi va qandaydir maksimal qiymatga to'xtovsiz yaqinlashib boradi. Boz ustiga, ushbu bosh qonunga ko'ra, issiqlik sovuq jismdan harorati balandroq bo'lgan issiq jismga o'z-o'zidan o'ta olmaydi.

Batafsil... Mulohaza bildiring

Yangilаndi: 08.10.2026 16:14

Vanadiy

20.09.2013 01:01 Muzaffar Qosimov Ma'lumotnomalar - Kimyo

Vanadiy

"Juda qadim, zamonlarda uzoq shimolda go'zal va hamma yaxshi ko'radigan ma'buda Vanadis yashar edi. Kunlarning birida kimdir uning eshigini taqillatdi. Ma'buda kresloga o'rnashib o'tirdi va "Yana bir marta taqillatsin" deb o'yladi.

Lekin eshik taqillamadi va eshikda uzoqlashayotgan qadam tovushi eshitildi. Vanadis bu odobli, lekin, qat'iyatsiz kishi kim ekanligiga qiziqdi. U derazani ochib ko'chaga qaradi. Bu saroydan shoshib uzoqlashayotgan valer ismli kimsa edi.

Bir necha kun o'tgach uning eshigini kimdir yana taqillatdi. Bu gal u o'rnidan turib eshikni ochmagunicha taqillayverdi. Ma'buda turib, eshikni o'chgach, yosh va kelishgan Nils Sevstryomga ro'baro' bo'ldi. Tez orada ular bir birlarini sevib qoldilar va tug'ilgan o'gillariga Vanadiy deb ism qo'ydilar."

Batafsil... Mulohaza bildiring

Yangilаndi: 14.04.2025 15:33

Mavzuga oid boshqa mаqоlаlаr...