Orbita . U Z

Ilm-fan fazosi uzra

  • Shrift o'lchamini kattalashtirish
  • Odatiy shrift o'lchami
  • Shrift o'lchamini kichiklashtirish
Bosh sahifa Maqolalar Tabiat qonunlari Mikroblarning antibiotiklarga bardoshliligi

Mikroblarning antibiotiklarga bardoshliligi

E-mail Chop etish
Maqola Reytingi: / 1
Juda yomon!A'lo! 
Maqola mundarijasi
Mikroblarning antibiotiklarga bardoshliligi
Мақолани кирилл алифбосида ўқинг
Hamma sahifa

Mikroblarning antibiotiklarga bardoshliligi

Mikroorganizmlarning populyatsiyasida (alohida bir a’zosida emas) vaqt o‘tishi bilan muayyan kimyoviy moddalarga, xususan, antibiotiklarga va pestitsidlarga qarshi chidamlilik shakllanishi mumkin.

Albatta, antibiotik dorilarga nisbatan chidamli bo‘lgan va dori ta’sir qilmaydigan mikroblar haqidagi vahimali gaplar ba’zan quloqqa chalinib turadi. Bu to‘g‘risida tibbiyot sohasi mutaxassislari yaxshiroq bilishadi albatta. Ayrim bemorlarda davolash jarayonida foydalanilgan muayyan bir antibiotikni boshqasiga, ya’ni, yanada kuchlirog‘iga almashtirishga to‘g‘ri kelganligi turgan gap. Mikroorganizmlar populyatsiyasida dori preparatlariga nisbatan bunday chidamlilik shakllanishi hodisasi, ba’zi hissiyotga beriluvchan jurnalist va yozuvchilar aytganidek, «ona tabiatning odamzotdan o‘ch olishi» emas, balki, tabiiy evolyutsiya qonuniyatlarining amaldagi ifodasi xolos.

 

Populyatsiyaning alohida bir a’zolari orasida farq va tafovutlarning mavjud bo‘lishi evolyutsiyaning eng asosiy tamoyillaridan biri sanaladi. O‘zbekona ibora bo‘lmish «besh qo‘l barobar emas» degani aynan shu o‘rinda ilmiy asosda namoyon bo‘ladi. Hozirgi kun genetika faniga yaxshi ma’lumki, populyatsiyaning a’zolarining o‘zaro tafovutga ega bo‘lishligi aslida har bir turning genetik darajasida kodlangan bo‘lar ekan. Boz ustiga, biokimyoviy nuqtai nazardan olganda, har qanday populyatsiyaning avlodlar davomiyligi aslida muayyan kimyoviy-molekulyar shakl almashinishlar ketma-ketligidan iborat jarayondir. Antibiotikning ta’sir mexanizmi esa, muayyan mikroorganizm turining hayoti uchun favqulodda muhim bo‘lgan biror kimyoviy reaksiyani sekinlashtirish yoki, uni butkul to‘xtatib qo‘yishga asoslanadi. Natijada, antibiotik ta’siriga tushgan mikrob populyatsiyasi halok bo‘lishi kerak. Masalan, penitsillin bakteriyalarning yangi hujayra qobiqlarini shakllanishida ishtirok etuvchi molekulalarni reaksiyaga kirishishdan to‘xtatib qo‘yadi. Natijada, mikroblarning tanasini tashkil qiluvchi hujayralari qobiqsiz qoladi va nobud bo‘ladi. Qo‘pol o‘xshatish bilan aytish mumkinki, penitsillinning mikroblarga ta’sirini, xuddi, kalit uchiga saqich yopishtirilganiga taqqoslash mumkin. Tasavvur qiling, shunday kalit eshikdagi teshikka kira olmay, aksincha, kalit teshigida yopishib qoladi va natijada eshikni ocholmaydigan qilib qo‘yadi. Penitsillin odam va hayvonlarga ta’sir qilmasligining oddiy sababi shundaki, bizning hujayralarimizning tashqi qoplamasi, ya’ni, qobig‘i, mikroorganizmlarning hujayra qobig‘idan mutlaqo farq qiladi.

Mikroorganizmlarning muayyan populyatsiyasida oz sonda bo‘lsa ham shunday tuzilishga ega a’zolar bo‘ladiki, ularning molekulyar tuzilishi va shakli, bemor tanasiga yuborilgan antibiotiklarning ta’sir mexanizmiga mos kelmaydi. Natijada, antibiotik bilan davolash kursidan so‘ng aynan o‘sha oz sondagi bakteriyalar yashab qoladi. Ular dastavval oz sonda bo‘lgani sababli, yangi kasalliklar qo‘zg‘atishga qodir bo‘lmaydi. Lekin, mazkur oz sonli a’zolari bilan yashab qolgan populyatsiya yashashda va ko‘payishda davom etadi. Bir necha avlod davomidan keyin, o‘sha populyatsiyada tabiiy tanlash qonuniyatlari asosida antibiotiklar ta’siriga beta’sir bo‘lgan a’zolar soni ko‘pchilikni tashkil qila boshlaydi. Oxir-oqibatda, ushbu populyatsiyaning aynan bir antibiotikka nisbatan ta’sirlanmaydigan butun boshli yangi avlodi shakllanadi. Mikroblar shu tariqa evolyutsiyalanib, yangidan-yangi tur vositasida odamzotga va xususan, ilm-fanga qarshi chiqaverardi.

Yana bir bora ta’kidlab o‘tish joizki, mikroorganizmlarning muayyan aniq bir antibiotik turiga nisbatan chidamlilik effekti ularning faqat bir necha avlodi almashishidan keyingina yuzaga chiqadi. Buning uchun esa muayyan vaqt ketadi. Boz ustiga, alohida olingan bir dona bakteriya bir o‘zi antibiotikka nisbatan mustaqil immunitet shakllantira olmaydi. Chunki, har qanday organizmning molekula shakli genetik darajada oldindan belgilanadi va uning hayoti davomida shakl o‘zgarishlariga uchramaydi.

Mikroblarning antibiotiklarga nisbatan chidamliligini o‘rganishga oid klassik eksperimentni 1952-yilda AQSHlik genetik olimlar Joshua va Ester Lederberglar o‘tkazishgan. Bunda, avvaliga Petri chashkalaridagi oddiy ozuqaviy muhitda muayyan bakteriyalar koloniyasi o‘stirilgan. Keyin esa, koloniyani qismlarga ajratib, ozuqa muhitiga penitsillin qo‘shilgan sharoitdagi boshqa chashkalarga ko‘chirilgan. Shunda, koloniyalarning aksariyat qismi yangi muhitda penitsillin mavjudligi sababli, qirilib ketgan. Lekin, muayyan juda oz sonli koloniyalar baribir yashab qolgan. Keyin esa, bu shunchaki tasodif emasligini isbotlash uchun, olimlar penitsillinsiz ozuqa muhitida o‘stirilgan eng birinchi - boshlang‘ich koloniyadan namuna olib, o‘sha yashab qolgan koloniya yoniga ko‘chirib o‘tqazishgan. Natijada, yashab qolgan va antibiotik ta’siriga uchramagan koloniya oldida, garchi avval bunday ta’sirga  uchramagan bo‘lsa-da, yangi qo‘shilgan a’zolar ham barqaror yashab ketgan. Keyingi kuzatishlar esa shuni ko‘rsatdiki, endi bu koloniya shunchaki yashab qolishdan tashqari, uning keyingi avlodi penitsillinli muhitda bemalol o‘sib, rivojlana boshlagan. Ushbu tajriba, mikroorganizmlarning antibiotiklarga chidamliligi mexanizmi aslida tabiiy tanlash qonuniyatiga asoslanganini ko‘rsatib berdi.

Qizig‘i shundaki, muayyan populyatsiyaning o‘ziga qarshi bo‘lgan zararkunandasi yoki kushandasiga qarshi chidamliligi effekti faqat mikroorganizmlarda emas, balki, yuksak organizmlarda ham kuzatiladi. Masalan, hashoratlar vaqt o‘tishi bilan pestitsidlarga nisbatan, o‘simliklar esa gerbitsidlarga nisbatan bardoshli bo‘lib qoladi. Bu o‘rinda ham, ta’sirga beta’sirlashish mexanizmi mikroorganizmlardagi singari kechadi. Ya’ni, populyatsiyaning muayyan alohida bir a’zolari tanasida pestitsid yoki, gerbitsid ta’siriga beta’sir kimyoviy o‘zgarishlar mavjud bo‘ladi va populyatsiyaning aynan o‘sha qismi yashab qoladi. Masalan, bu kimyoviy o‘zgarish hashorat yoki o‘simlik tanasidagi qandaydir noyob bir molekula bo‘lib, u pestitsid yoki gerbitsid molekulasini neytrallab qo‘yishi mumkin. Yoki, o‘sha hashorat yoki, o‘simlik tanasida maxsus bir kimyoviy modda shakllanib, pestitsid yoki gerbitsid molekulasini tanaga tushishi bilan, hali uning ta’siri boshlanmasidan avvali, uni hujayralardan darhol yana qayta chiqarib tashlashi mumkin. Natijada, tabiiy tanlash asosida, populyatsiyaning shunday xususiyatlarga ega bo‘lgan a’zolari yashab qoladi va keyingi avlod ulardan tarqaladi. Ulardan tarqagan keyingi avlod esa, endi ushbu foydali xossaga to‘liq ega bo‘ladi va endilikda mazkur tur o‘ziga qarshi zararkunandalarga chidamli bo‘lib qoladi.

Shunisi ajablanarliki, tabiiy tanlash va evolyutsiya haqidagi ilmiy ta’limot, antibiotiklar kashf etilishi va ulardan mikroblarga qarshi kurashda foydalanish boshlanishidan ancha avval paydo bo‘lgan edi. Ya’ni, olimlar har qanday populyatsiyada, shu jumladan, mikroorganizmlarda ham tabiiy tanlash qonunlari amal qilishini avvaldan bilishgan. Lekin, antibiotik qo‘llaganda mikroorganizmlarda shunday chidamlilik effekti yuzaga kelishini olimlar avvaldan inobatga olishlari, yoki, hech bo‘lmaganda, ushbu faktni taxmin qilishlari kerak edi. Lekin, nima uchundir bunday bo‘lmadi. Mikroblarning antibiotiklarga bardoshliligi effekti bir necha bemorlarda amalda ko‘zga tashlanmaguncha, bu jarayon hech kimning xayoliga kelmagan. Aslida ushbu holat, antibiotiklar va boshqa kimyoviy preparatlarning foydali effekti yetarlicha emasligini emas, aksincha, inson tabiatining mukammal xilqat emasligini ko‘rsatadi. Lekin, shu bilan birga, mikroblarning dori antibiotiklarga nisbatan chidamli bo‘lib qolishi, endilikda antibiotiklarning insoniyatga keltirgan ulkan nafiga ha soya solmasligi kerak. O‘z vaqtida, penitsillin va boshqa antibiotiklarni qo‘llash tufayli, bemorlarning tezroq oyoqqa turishi, butun boshli armiyalarning askarlari tezroq safga qaytishi ta’minlangan. Umuman olganda, II-jahon urushidan keyingi davra odamzot populyatsiyasining deyarli ikki barobar ortishi va sayyoramizda o‘rtacha umr davomiyligi 47,7 yoshdan 71 yoshgacha uzayishi, aynan antibiotik dorilar yordamida ko‘plab kasalliklarni yengganimiz sababidandir. Mikrob va bakteriyalarning endilikda allaqachon shakllanib qolgan chidamliligi esa, ularning kurashda hali beri bizdan bo‘sh kelmasligini bildiradi. Ya’ni, ularni shunchaki bitta urush bilan yengib bo‘lmaydigan armiya deb tasavvur qilish to‘g‘ri bo‘ladi. Buni yana bir qo‘pol o‘xshatish bilan ifodalash mumkin: mikroblar va odamzotning ularga qarshi antibiotik qurollar bilan qarshi kurashi, xuddi siyosiy qutblarning qurollanish va biri-biriga nisbatan tahdid qilish poygasiga o‘xshaydi. Qurollanish poygasida ham taraflarning biri muayyan kuchli qurol ixtiro qilib, vaqtinchalik tashabbus va gegemonlikka ega bo‘ladi. Ikkinchi taraf esa unga qarshi, undanda kuchli qurol tayyorlaydi. Keyin birinchi taraf yanada kuchliroq qurol o‘ylab topadi. Narigi taraf esa undan ham battarini ishlab chiqadi va ho kazo. Statistikaga ko‘ra, so‘nggi 3500 yil tarix mobaynida odamzot faqat 230 yil hech qanday urushlarsiz, tinch totuv yashagan ekan. Ibtidoiy odamlar davrida shunchaki tosh va suyak qurollar bilan boshlangan qurollanish poygasi, keyinchalik o‘q-yoy, miltiq, artilleriya va mana nihoyat qirg‘inbarot yadroviy qurollargacha yetib kelganidan xulosa qilsak, bizning qurollanish borasidagi ahmoqona dunyoqarashimizga ona tabiatning o‘zi bas kelmasa, odamzotning o‘zi qurollanish poygasini hech qachon ongli ravishda to‘xtatmaydigan ko‘rinadi. Taxminimcha, mikroblar bilan jangimiz ham xuddi shunday: ular hech qachon taslim bo‘lmaydi va ularga qarshi kurash hech qachon to‘xtamaydi. Mikroblarni butunlay mag‘lub qilish imkonsiz. Chunki, mikroorganizmlarning evolyutsion potentsialini biz aniq bila olmaymiz. Mikroblar bilan jangda eng asosiysi shuki, bizning ularga qarshi qo‘yadigan texnologiyalarimiz ularning evolyutsion potentsialidan imkon qadar oldinga o‘zib ketishi kerak. Bu esa bizga kasalliklarni nazoratda tutish va ulardan uzoqroq yurish imkonini beradi. G‘alaba uchun shuni o‘zi ham kifoya qilishi mumkin...


Bizni ijtimoiy tarmoqlarda ham kuzatib boring:

Feysbukda: https://www.facebook.com/Orbita.Uz/

Tvitterda: @OrbitaUz

Google+ : https://plus.google.com/104225891102513041205/posts/

Telegramdagi kanalimiz: https://telegram.me/OrbitaUz

 


Микробларнинг антибиотикларга бардошлилиги

Микроорганизмларнинг популяциясида (алоҳида бир аъзосида эмас) вақт ўтиши билан муайян кимёвий моддаларга, хусусан, антибиотикларга ва пестицидларга қарши чидамлилик шаклланиши мумкин.

Албатта, антибиотик дориларга нисбатан чидамли бўлган ва дори таъсир қилмайдиган микроблар ҳақидаги ваҳимали гаплар баъзан қулоққа чалиниб туради. Бу тўғрисида тиббиёт соҳаси мутахассислари яхшироқ билишади албатта. Айрим беморларда даволаш жараёнида фойдаланилган муайян бир антибиотикни бошқасига, яъни, янада кучлироғига алмаштиришга тўғри келганлиги турган гап. Микроорганизмлар популяциясида дори препаратларига нисбатан бундай чидамлилик шаклланиши ҳодисаси, баъзи ҳиссиётга берилувчан журналист ва ёзувчилар айтганидек, «она табиатнинг одамзотдан ўч олиши» эмас, балки, табиий эволюция қонуниятларининг амалдаги ифодаси холос.

Популяциянинг алоҳида бир аъзолари орасида фарқ ва тафовутларнинг мавжуд бўлиши эволюциянинг энг асосий тамойилларидан бири саналади. Ўзбекона ибора бўлмиш «беш қўл баробар эмас» дегани айнан шу ўринда илмий асосда намоён бўлади. Ҳозирги кун генетика фанига яхши маълумки, популяциянинг аъзоларининг ўзаро тафовутга эга бўлишлиги аслида ҳар бир турнинг генетик даражасида кодланган бўлар экан. Боз устига, биокимёвий нуқтаи назардан олганда, ҳар қандай популяциянинг авлодлар давомийлиги аслида муайян кимёвий-молекуляр шакл алмашинишлар кетма-кетлигидан иборат жараёндир. Антибиотикнинг таъсир механизми эса, муайян микроорганизм турининг ҳаёти учун фавқулодда муҳим бўлган бирор кимёвий реакцияни секинлаштириш ёки, уни буткул тўхтатиб қўйишга асосланади. Натижада, антибиотик таъсирига тушган микроб популяцияси ҳалок бўлиши керак. Масалан, пенициллин бактерияларнинг янги ҳужайра қобиқларини шаклланишида иштирок этувчи молекулаларни реакцияга киришишдан тўхтатиб қўяди. Натижада, микробларнинг танасини ташкил қилувчи ҳужайралари қобиқсиз қолади ва нобуд бўлади. Қўпол ўхшатиш билан айтиш мумкинки, пенициллиннинг микробларга таъсирини, худди, калит учига сақич ёпиштирилганига таққослаш мумкин. Тасаввур қилинг, шундай калит эшикдаги тешикка кира олмай, аксинча, калит тешигида ёпишиб қолади ва натижада эшикни очолмайдиган қилиб қўяди. Пенициллин одам ва ҳайвонларга таъсир қилмаслигининг оддий сабаби шундаки, бизнинг ҳужайраларимизнинг ташқи қопламаси, яъни, қобиғи, микроорганизмларнинг ҳужайра қобиғидан мутлақо фарқ қилади.

Микроорганизмларнинг муайян популяциясида оз сонда бўлса ҳам шундай тузилишга эга аъзолар бўладики, уларнинг молекуляр тузилиши ва шакли, бемор танасига юборилган антибиотикларнинг таъсир механизмига мос келмайди. Натижада, антибиотик билан даволаш курсидан сўнг айнан ўша оз сондаги бактериялар яшаб қолади. Улар даставвал оз сонда бўлгани сабабли, янги касалликлар қўзғатишга қодир бўлмайди. Лекин, мазкур оз сонли аъзолари билан яшаб қолган популяция яшашда ва кўпайишда давом этади. Бир неча авлод давомидан кейин, ўша популяцияда табиий танлаш қонуниятлари асосида антибиотиклар таъсирига бетаъсир бўлган аъзолар сони кўпчиликни ташкил қила бошлайди. Охир-оқибатда, ушбу популяциянинг айнан бир антибиотикка нисбатан таъсирланмайдиган бутун бошли янги авлоди шаклланади. Микроблар шу тариқа эволюцияланиб, янгидан-янги тур воситасида одамзотга ва хусусан, илм-фанга қарши чиқаверарди.

Яна бир бора таъкидлаб ўтиш жоизки, микроорганизмларнинг муайян аниқ бир антибиотик турига нисбатан чидамлилик эффекти уларнинг фақат бир неча авлоди алмашишидан кейингина юзага чиқади. Бунинг учун эса муайян вақт кетади. Боз устига, алоҳида олинган бир дона бактерия бир ўзи антибиотикка нисбатан мустақил иммунитет шакллантира олмайди. Чунки, ҳар қандай организмнинг молекула шакли генетик даражада олдиндан белгиланади ва унинг ҳаёти давомида шакл ўзгаришларига учрамайди.

Микробларнинг антибиотикларга нисбатан чидамлилигини ўрганишга оид классик экспериментни 1952-йилда АҚШлик генетик олимлар Жошуа ва Эстер Ледерберглар ўтказишган. Бунда, аввалига Петри чашкаларидаги оддий озуқавий муҳитда муайян бактериялар колонияси ўстирилган. Кейин эса, колонияни қисмларга ажратиб, озуқа муҳитига пенициллин қўшилган шароитдаги бошқа чашкаларга кўчирилган. Шунда, колонияларнинг аксарият қисми янги муҳитда пенициллин мавжудлиги сабабли, қирилиб кетган. Лекин, муайян жуда оз сонли колониялар барибир яшаб қолган. Кейин эса, бу шунчаки тасодиф эмаслигини исботлаш учун, олимлар пенициллинсиз озуқа муҳитида ўстирилган энг биринчи - бошланғич колониядан намуна олиб, ўша яшаб қолган колония ёнига кўчириб ўтқазишган. Натижада, яшаб қолган ва антибиотик таъсирига учрамаган колония олдида, гарчи аввал бундай таъсирга учрамаган бўлсада, янги қўшилган аъзолар ҳам барқарор яшаб кетган. Кейинги кузатишлар эса шуни кўрсатдики, энди бу колония шунчаки яшаб қолишдан ташқари, унинг кейинги авлоди пенициллинли муҳитда бемалол ўсиб, ривожлана бошлаган. Ушбу тажриба, микроорганизмларнинг антибиотикларга чидамлилиги механизми аслида табиий танлаш қонуниятига асосланганини кўрсатиб берди.

Қизиғи шундаки, муайян популяциянинг ўзига қарши бўлган зараркунандаси ёки кушандасига қарши чидамлилиги эффекти фақат микроорганизмларда эмас, балки, юксак организмларда ҳам кузатилади. Масалан, ҳашоратлар вақт ўтиши билан пестицидларга нисбатан, ўсимликлар эса гербитсидларга нисбатан бардошли бўлиб қолади. Бу ўринда ҳам, таъсирга бетаъсирлашиш механизми микроорганизмлардаги сингари кечади. Яъни, популяциянинг муайян алоҳида бир аъзолари танасида пестицид ёки, гербитсид таъсирига бетаъсир кимёвий ўзгаришлар мавжуд бўлади ва популяциянинг айнан ўша қисми яшаб қолади. Масалан, бу кимёвий ўзгариш ҳашорат ёки ўсимлик танасидаги қандайдир ноёб бир молекула бўлиб, у пестицид ёки гербитсид молекуласини нейтраллаб қўйиши мумкин. Ёки, ўша ҳашорат ёки, ўсимлик танасида махсус бир кимёвий модда шаклланиб, пестицид ёки гербитсид молекуласини танага тушиши билан, ҳали унинг таъсири бошланмасидан аввали, уни ҳужайралардан дарҳол яна қайта чиқариб ташлаши мумкин. Натижада, табиий танлаш асосида, популяциянинг шундай хусусиятларга эга бўлган аъзолари яшаб қолади ва кейинги авлод улардан тарқалади. Улардан тарқаган кейинги авлод эса, энди ушбу фойдали хоссага тўлиқ эга бўлади ва эндиликда мазкур тур ўзига қарши зараркунандаларга чидамли бўлиб қолади.

Шуниси ажабланарлики, табиий танлаш ва эволюция ҳақидаги илмий таълимот, антибиотиклар кашф этилиши ва улардан микробларга қарши курашда фойдаланиш бошланишидан анча аввал пайдо бўлган эди. Яъни, олимлар ҳар қандай популяцияда, шу жумладан, микроорганизмларда ҳам табиий танлаш қонунлари амал қилишини аввалдан билишган. Лекин, антибиотик қўллаганда микроорганизмларда шундай чидамлилик эффекти юзага келишини олимлар аввалдан инобатга олишлари, ёки, ҳеч бўлмаганда, ушбу фактни тахмин қилишлари керак эди. Лекин, нима учундир бундай бўлмади. Микробларнинг антибиотикларга бардошлилиги эффекти бир неча беморларда амалда кўзга ташланмагунча, бу жараён ҳеч кимнинг хаёлига келмаган. Аслида ушбу ҳолат, антибиотиклар ва бошқа кимёвий препаратларнинг фойдали эффекти етарлича эмаслигини эмас, аксинча, инсон табиатининг мукаммал хилқат эмаслигини кўрсатади. Лекин, шу билан бирга, микробларнинг дори антибиотикларга нисбатан чидамли бўлиб қолиши, эндиликда антибиотикларнинг инсониятга келтирган улкан нафига ҳа соя солмаслиги керак. Ўз вақтида, пенициллин ва бошқа антибиотикларни қўллаш туфайли, беморларнинг тезроқ оёққа туриши, бутун бошли армияларнинг аскарлари тезроқ сафга қайтиши таъминланган. Умуман олганда, II-жаҳон урушидан кейинги давра одамзот популяциясининг деярли икки баробар ортиши ва сайёрамизда ўртача умр давомийлиги 47,7 ёшдан 71 ёшгача узайиши, айнан антибиотик дорилар ёрдамида кўплаб касалликларни енгганимиз сабабидандир. Микроб ва бактерияларнинг эндиликда аллақачон шаклланиб қолган чидамлилиги эса, уларнинг курашда ҳали бери биздан бўш келмаслигини билдиради. Яъни, уларни шунчаки битта уруш билан енгиб бўлмайдиган армия деб тасаввур қилиш тўғри бўлади. Буни яна бир қўпол ўхшатиш билан ифодалаш мумкин: микроблар ва одамзотнинг уларга қарши антибиотик қуроллар билан қарши кураши, худди сиёсий қутбларнинг қуролланиш ва бири-бирига нисбатан таҳдид қилиш пойгасига ўхшайди. Қуролланиш пойгасида ҳам тарафларнинг бири муайян кучли қурол ихтиро қилиб, вақтинчалик ташаббус ва гегемонликка эга бўлади. Иккинчи тараф эса унга қарши, унданда кучли қурол тайёрлайди. Кейин биринчи тараф янада кучлироқ қурол ўйлаб топади. Нариги тараф эса ундан ҳам баттарини ишлаб чиқади ва ҳо казо. Статистикага кўра, сўнгги 3500 йил тарих мобайнида одамзот фақат 230 йил ҳеч қандай урушларсиз, тинч тотув яшаган экан. Ибтидоий одамлар даврида шунчаки тош ва суяк қуроллар билан бошланган қуролланиш пойгаси, кейинчалик ўқ-ёй, милтиқ, артиллерия ва мана ниҳоят қирғинбарот ядровий қуролларгача етиб келганидан хулоса қилсак, бизнинг қуролланиш борасидаги аҳмоқона дунёқарашимизга она табиатнинг ўзи бас келмаса, одамзотнинг ўзи қуролланиш пойгасини ҳеч қачон онгли равишда тўхтатмайдиган кўринади. Тахминимча, микроблар билан жангимиз ҳам худди шундай: улар ҳеч қачон таслим бўлмайди ва уларга қарши кураш ҳеч қачон тўхтамайди. Микробларни бутунлай мағлуб қилиш имконсиз. Чунки, микроорганизмларнинг эволюцион потенциалини биз аниқ била олмаймиз. Микроблар билан жангда энг асосийси шуки, бизнинг уларга қарши қўядиган технологияларимиз уларнинг эволюцион потенциалидан имкон қадар олдинга ўзиб кетиши керак. Бу эса бизга касалликларни назоратда тутиш ва улардан узоқроқ юриш имконини беради. Ғалаба учун шуни ўзи ҳам кифоя қилиши мумкин...


Бизни ижтимоий тармоқларда ҳам кузатиб боринг:

Фейсбукда: https://www.facebook.com/Orbita.Uz/

Твиттерда: @OrbitaUz

Google+ : https://plus.google.com/104225891102513041205/posts/

Телеграмдаги каналимиз: https://telegram.me/OrbitaUz

Yangilаndi: 06.11.2017 08:00  
Maqola yoqdimi? Do'stlaringizga ham tavsiya qiling:

Mulohaza bildiring:


Mahfiy kod
Yangilash

Banner

Orbita.Uz infotekasi

Milliy bayramlarimiz

Yaqin kunlardagi rasmiy bayramlar, kasb bayramlari, muhim tarixiy va xalqaro sanalar.

26 - Iyun - Iyd al-Fitr - Ramazon hayiti Dam olish kuni) (oy chiqishiga qarab bir kunga o'zgarishi mumkin)


1 - Sentyabr - Mustaqillik kuni. (Dam olish kuni)


2 - Sentyabr - Iyd al-Adho - Qurbon Hayiti . (Dam olish kuni) (oy chiqishiga qarab bir kunga o'zgarishi mumkin)

O'zbekiston shaharlari ob-havo ma'lumotlari

Orbita.Uz do'stlari:

Ziyo istagan qalblar uchun:

O'zbek tilidagi eng katta elektron kutubxona!

​Ўзбекча va o'zbekcha o'zaro transkripsiya!
O'zbekcha va ўзбекча ўзаро транскрипция!

Bizning statistika


Orbital latifalar :) :)

СмешноУлыбаюсьПодмигиваю

Agar yakuniy natija masalani yechish usuliga bog’liq bo’lmasa, u matematika,

agar bog’liq bo’lsa u – buxgalteriya...



Tafakkur durdonalari

Farzandlarimiz bizdan ko'ra kuchli, aqlli va baxtli bo'lishlari shart...

I. Karimov